Балдарга ден соолук тартуулоо: Кадамжай районундагы Өндүрүштүк-логистикалык борбордун кайрымдуулук акциясы

Балдардын ден соолугунан артык эмне бар? Бул суроонун жообу айкындай сезилгени менен ар бир баланын, айрыкча алыскы райондордогу балдардын сапаттуу тамактануусун кантип камсыз кылууга болот деген маселе жаралат.  Баткен облусунун Кадамжай районунда бул маселени биргелешип, камкордук жана көңүл борборунда коюу менен чечип жатышат.

2023-жылдан баштап, Бириккен Улуттар Уюмунун Бүткүл дүйнөлүк азык-түлүк программасынын жана Россиянын Тармактык тамактануу институтунун демилгеси аркасында «Бий Көк» кооперативинин базасында түзүлгөн Өндүрүштүк-логистикалык борбор (ӨЛБ) район мектептерин жаңы жана экологиялык таза азыктар менен камсыз кылып келет.  2024-жылдын ноябрь-декабрь айларында борбор мектептерге жана бала бакчаларга жашылча-жемиштерди бекер жеткирүү менен кайрымдуулук акциясын уюштурду. Бул жардамдын жалпы суммасы 100 000 сомду түздү.

Балдар үчүн пайдасы

Орозбай Маканов атындагы мектептин окуучулары Өндүрүштүк-логистикалык борбор  (ӨЛБ) тарабынан уюштурулган акциянын аркасында алардын тамактануусуна кошулган жаңы даамдуу тамактар тууралуу  пикирлерин кубануу менен айтышууда. Мектептин ашпозчусу Гупбара Акматова мектеп менюсу тууралуу төмөнкүлөрдү баяндады:
            «Дүйшөмбү күндөрү бизде сүттөн жасалган тамактар болот, ал эми башка күндөрү жашылча же эт кошулуучу тамактарды даярдайбыз. Менюда: картофель пюреси, жашылчалар менен макарон, картошка жана сабиз кошулган гречка  боткосу».

Мектептеги тамактануу бул жерде жөн гана тамак эмес. Бул балдардын ден соолугуна жана келечегине болгон салым. Жаңы жашылчалардын кошулмасы менен тамактар ар түрдүү жана азыктуулукка бай боло баштады.

Мунун баары кантип уюштурулду?

«Бий Көк» айыл чарба кооперативи – аймактын чыныгы сыймыгы. 2050 метр бийиктиктеги Шак-Шак айылында органикалык азыктар өстүрүлөт. Баары химикатсыз, табигый жер семирткичтер менен балдардын эң жакшы азыктарды алуусу үчүн  өндүрүлөт.

Кооперативдин мүчөсү Мырзали Манасов белгилейт:
            «Биз жерди табигый азыктандыруу үчүн малдын кыгын колдонобуз, ошентип экологиялык таза азыктарды өстүрөбүз. Биздин максат – өсүп келе жаткан муунду табигый жана сапаттуу азыктар менен камсыз кылуу. Ушул миссиянын алкагында биз кайрымдуулук акциясын уюштурдук».

Маканов атындагы мектептин директору Нурила Колдошева ыраазычылыгын жашырбайт:
           «Өндүрүштүк-логистикалык борбордун (ӨЛБ) акциясы – бул чыныгы колдоо. Биздин окуучулар сапаттуу тамактануу менен камсыз болушууда».

А аныгында, бул башталышы гана. Кооператив картошканын жаңы сортун иштеп чыгууда жана аймактын мектептерин колдоону улантууда.

Келечекке пландар

Алдыда жаңы максаттар бар. Өндүрүштүк-логистикалык борбор (ӨЛБ) программаларын кеңейтип, дагы көп мектептерди сапаттуу азыктар менен камсыздоону пландоодо. Ал эми Кадамжай районунун Агрардык өнүктүрүү башкармалыгы кооперативдин мындан ары өнүгүүсүнө шарт түзүү максатын көздөп, жаңы жерлерди бөлүп берүүнү убада кылууда.

Кадамжай агрардык өнүктүрүү башкармалыгынын башчысы Абдыгани Жолдошев белгилейт:
            «Өз кезегинде сапаттуу азыктар менен камсыздап, мектептерге көмөк көрсөткөнү үчүн  биз кооперативди колдойбуз».

Мындай акциялар бир жолку жардам эмес, узак мөөнөттүү инвестиция болуп саналат. Анткени, туура тамактануу – ийгиликтүү келечектин кепилдиги! Ал эми кайдыгер эмес адамдар ишти өз колуна алганда, өзгөрүүлөр тезирээк болот эмеспи.

Видео: https://www.youtube.com/watch?v=YezhozjxrlY&t=9s