19-августан 20-августка чейин Кыргызстандын кооз бурчунда, Ысык-Көлдүн жээгинде, Чок-Тал айылындагы «Дельфин» пансионатында билим берүү тармагындагы инновациялык чечимдердин биринчи кыргыз-орус жарманкеси болуп өттү. Иш-чара эки өлкөнүн тең билим берүү тармагынын алдыңкы өкүлдөрүн: Россиянын «Сириус» университетинин жана «Просвещение» басмаканасынын, Эл аралык Ала-Тоо университетинин жана Баткен мамлекеттик университетинин өкүлдөрүн чогултуп, жөн гана идеялар менен алмашуу аянтчасы болбостон, ошондой эле эки тараптуу кызматташтыкты чыңдоонун символу болуп калды. Мектеп билим берүү тармагында инновациялык чечимдерди тартуулаган Россиянын тармактык тамактануу институту (SIFI) бул иш-чаранын катышуучуларынын бири болду.
Символикалык ачылыш
Иш-чара Россия менен Кыргызстандын элдеринин маданий байланышын билдирген кыргыздын улуттук боз үйүн орнотуу менен ачылды. Боз үй үйдүн, жайлуулуктун жана салттуу баалуулуктардын символу катары иш-чаранын негизги идеясын – билим берүүдөгү инновациялык ыкмалар менен айкалыштырып, мыкты улуттук каада-салттарды сактоону жана өнүктүрүүнү эң сонун чагылдырган.
Технологиялык лидерликке жетишүүдө билим берүүнүн ролу
Жарманкенин негизги темаларынын бири технологиялык лидерликке жетишүүдө билим берүүнүн ролун талкуулоо болду. Алдыңкы эксперттер жогорку квалификациялуу адистерди даярдоо илим менен техникадагы жаңы чечимдердин негизи болуп калышы мүмкүн деген ойлорун ортого салышты. Кыргызстанда колдонууга ылайыкташа турган окутуунун жаңы технологияларына жана окутуу усулдарына өзгөчө көңүл бурулду.
Бул талкуулардын алкагында SIFI билим берүү программаларына сергек жашоо мүнөзүнүн негиздерин киргизүүнүн маанилүүлүгүн баса белгиледи, бул өз кезегинде жаш муундун гармониялуу өнүгүшүнө жана анын заманбап чакырыктарды чечүүгө даяр болушуна өбөлгө түзөт.
SIFI тарабынан презентация
Жарманкенин биринчи күнүндө SIFI 1-4-класстар үчүн «Сергек жашоо мүнөзүнүн негиздери» окуу-методикалык комплексин (ОМК) тартуулады. Комплекс институттун адистери тарабынан иштелип чыгып, Кыргыз Республикасынын Билим берүү жана илим министрлиги тарабынан жактырылган жана буга чейин өлкөнүн мектептеринде сыноодон өткөн.
Презентация жарманкенин катышуучуларынын зор кызыгуусун жаратты. Конокторго түшүнүктүү болуу үчүн тестирлөөнүн алкагында өткөрүлгөн сабактардын үзүндүлөрү көрсөтүлдү. Катышуучулар сабактар кандай өтүп жатканын жана балдарды окуу процессине тартуунун кандай ыкмаларын колдонуп жатканын көрүштү. Берилген материалдар мугалимдер үчүн программадан баштап, окуучулар үчүн иш дептерлерге чейин ОМКнин ар бир компоненти менен толук таанышууга мүмкүндүк берди.
Ошондой эле SIFI комплексти мектеп программасына киргизүүнүн натыйжалуулугун далилдеген статистикалык маалыматтарды берди. Тесттин жыйынтыгы балдардын сергек жашоо мүнөзү боюнча билиминин олуттуу жакшырганын жана бул билимди практикада колдонууга умтулуусун көрсөттү.
Интерактивдүү элементтер жана пикир алмашуу
Презентациянын бир бөлүгү болгон интерактивдүү көнүгүүлөр коноктордун өзгөчө көңүлүн бурушту. Катышуучулар ОМК алкагында колдонулган ыкмаларды жеке сынап көрүү мүмкүнчүлүгүнө ээ болушту: дене тарбия мүнөттөрү жана ашканадагы коопсуздук эрежелери боюнча тапшырмалар, «Билермандар» онлайн викторинасы. Интерактив жандуу талкууларды жаратып, SIFI ыкмаларынын натыйжалуулугун так баалоого мүмкүнчүлүк түздү.
Көптөгөн катышуучулар, анын ичинде мугалимдер жана билим берүү мекемелеринин өкүлдөрү, окутуунун мындай ыкмасы балдардын көңүлүн бурууга жардам берип, окуу процессин кызыктуу жана таасирдүү кылаарын белгилешти.
Презентациянын аягында эң активдүү катышуучулар Кыргызстандагы мектептеги тамактануу программасы алкагында БУУ ДАТП жана SIFI тарабынан иштелип чыккан “Кыргыз Республикасындагы мектептерде ысык тамак уюштуруу үчүн Рецепттер китебин” же балдар жана ата-энелер үчүн “Бирге даярдайбыз” рецепттер китебин белекке алышты, бул жагымдуу бонус жана мындан аркы кызматташуу үчүн стимул болуп калды. Калган конокторго SIFI материалдарынын электрондук версияларына жана ата-энелер үчүн tamakash.edu.gov.kg веб-порталына кирүү үчүн QR коду бар визиттик карталары тапшырылды.
Презентациядан кийин катышуучулар өздөрүнүн таасирлери менен активдүү бөлүшүштү. Ош шаарынын мугалими ОМК чынында эле балдарга билим алууга гана эмес, аны иш жүзүндө колдонууга да жардам берерин белгиледи: «Балдар сергек жашоо мүнөзүнүн маанилүүлүгүн түшүнүп, адаттарын өзгөртүүгө умтула баштаганы көрүнүп турат».
Аксуу районунун билим берүү бөлүмүнүн өкүлү интерактивдүү тапшырмалардын жана дене тарбия мүнөттөрүнүн маанилүүлүгүн баса белгиледи: «Бул өзгөчө заманбап шарттарда, балдардын бир иштин бир түрүнө көңүл буруусу кыйын болуп турганда абдан маанилүү», – деп кошумчалады ал.
Балыкчы шаарындагы бала бакчанын жетекчиси комплексти мектепке чейинки билим берүү мекемелерине ылайыкташтырууга кызыкдар экенин билдирип: «Бул комплекс балдар үчүн гана эмес, ата-энелер үчүн да пайдалуу болушу мүмкүн», – деп белгиледи.
Перспективалар жана жыйынтык чыгаруу
«Сергек жашоо мүнөзүнүн негиздери» ОМК эксперттер жана катышуучулар тарабынан жогору бааланды, бул Кыргызстандын мектептеринде андан ары жайылтуу үчүн чоң мүмкүнчүлүктөрдү ачат. Институт өз кезегинде балдардын ден соолугун чыңдоого жана бакубат жашоого багытталган билим берүү программаларын иштеп чыгуу жана өркүндөтүү боюнча иштерди улантат.
Россия менен Кыргызстандын билим берүү тармагындагы ийгиликтүү кызматташуусу эки өлкөгө жогорку квалификациялуу адистерди даярдоодо жаңы деңгээлге чыгууга жардам бере турган жетишкендиктердин негизи болуп саналат.
Жарманке мындай демилгелерди көрсөтүү үчүн эң сонун аянтчаны түздү жана SIFIнин катышуусу инновациялардын балдардын билимине жана ден соолугуна кандай оң таасирин тийгизе тургандыгынын ачык мисалы болду. Алдыда ушундай иш-чаралардын жана эффективдүү кызматташуунун аркасында ишке аша турган жаңы долбоорлор жана амбициялуу максаттар турат.
